Abasirikare ba Brigade ya 507 ya RDF basoje amahugurwa yo ku rwego rwisumbuye i Gabiro

Aya mahugurwa yari agamije kongerera abasirikare ubumenyi, ubuhanga n’ubushobozi mu gusohoza neza inshingano za gisirikare no kubategura guhangana n’ibibazo bitandukanye bibugarije.

Umuhango wo gusoza aya mahugurwa wabaye ku wa 9 Nyakanga 2026, uyoborwa n’Umugaba Mukuru w’Ingabo z’u Rwanda, Gen. Mubarakh Muganga.

Mu ijambo rye, Gen. Mubarakh Muganga yibukije abasirikare impanuro bahora bahabwa na Perezida wa Repubulika akaba n’Umugaba w’Ikirenga w’Ingabo z’u Rwanda, Paul Kagame, ushimangira ko imyitozo ya gisirikare ari ingenzi mu gutegura abasirikare kwihanganira ibihe bikomeye no gusohoza inshingano zabo bafite imbaraga z’umubiri, gutekereza neza n’ubunyamwuga buhanitse.

Yabasabye guhora baharanira gutanga umusaruro mwiza, bakoresha neza ubushobozi n’ibikoresho bafite, bakuzuza inshingano zabo barangwa n’ikinyabupfura cya gisirikare, guhanga udushya no gukorera hamwe.

Gen. Muganga yanashimiye ubuyobozi bw’Ikigo cy’Amahugurwa cya Gisirikare cya Gabiro (Combat Training Centre Gabiro), by’umwihariko abatoza, kubera ubwitange bagaragaje mu kongerera abahugurwa ubumenyi, ubunyamwuga n’ubushobozi bwo kuyobora.

Yashimangiye ko amahugurwa nk’aya akomeza kugira uruhare rukomeye mu kubaka Ingabo z’u Rwanda zifite ubushobozi bwo kurinda umutekano w’Igihugu no gusohoza neza inshingano zazo, haba imbere mu gihugu no mu bikorwa mpuzamahanga byo kubungabunga amahoro.