AFC/M23 yongeye gufata Lumbishi na Numbi nyuma y'amasaha hafashwe na Wazalendo

Ku wa Kabiri tariki ya 6 Ukwakira 2026, ihuriro ry’ingabo zirwanira ku ruhande rwa Leta ya Repubulika Iharanira Demokarasi ya Congo, ririmo cyane cyane abarwanyi ba Wazalendo na FDLR, ryari ryafashe Umujyi wa Shanje, agace ka Gasenda ndetse n’udusozi twa Bukumba, muri Teritwari ya Kalehe.

Ariko amakuru akurikiraho avuga ko abarwanyi ba AFC/M23 bongeye gusubira muri ibyo bice, bigatuma igenzurwa ryabyo risubira mu maboko yabo.

Mbere y’uko abarwanyi bavugwaho kuba barasubiye inyuma bava muri ibyo bice, ku wa Gatatu tariki ya 7 Ukwakira 2026, guhera ahagana saa yine n’igice za mu gitondo, haravugwa ibikorwa byangiza ibikorwa remezo n’imitungo y’abaturage mu gace ka Shanje no mu nkengero zako.

Mu itangazo ryashyizwe ahagaragara n’ihuriro AFC/M23, rivuga ko amazu menshi y'abasivili yatwitse hamwe n'isoko ryaho.

Amakuru aturuka muri ako gace avuga ko amazu agera kuri 60, harimo n’utuzu tw’ubucuruzi twa kiosque, yatwitswe muri centre ya Shanje.

Hari kandi amakuru avuga ko habayeho gusahura no kwiba amatungo, birimo amashyo abiri y’inka bivugwa ko yari aya Gen. Gabriel Amisi Kumba, uzwi nka Tango Four.

Kalehe ni imwe mu teritwari zo muri Kivu y’Amajyepfo zakomeje kuvugwamo ibikorwa by’imirwano hagati y’impande zitandukanye zishyamiranye mu burasirazuba bwa RDC.

Kugeza ubu, amakuru ku igenzura rya Lumbishi, Shanje, Kavumu na Numbi akomeje gutangwa mu buryo butandukanye n’impande ziri mu mirwano.

Amakuru avuga ko AFC/M23 yongeye kwigarurira ibi bice ntabwo aragenzuwe mu buryo bwigenga, kimwe n’amakuru ku mubare w’amazu yatwitswe, abasahuye n’imitungo yatakaye.

Imirwano n’ihindagurika ry’igenzura ry’uduce muri Kalehe bikomeje guteza impungenge ku baturage, cyane cyane abatuye hafi y’ibice birimo imirwano.