FARDC yungutse abasirikare bashya b’ingabo zidasanzwe (Special Force) barangije amahugurwa y’amezi atandatu

Umuhango wo gusoza aya mahugurwa wabaye ku wa Gatandatu tariki ya 25 Nyakanga 2026 mu kigo cya gisirikare cya Kibomango, uyoborwa na Guverineri w’Intara ya Kasaï y’Iburasirazuba, Jean-Paul Mbwebwa Kapo.

Aba basirikare bagize icyiciro cya mbere cy’umutwe wihariye washyizweho hashingiwe ku cyemezo cya Perezida wa Repubulika Iharanira Demokarasi ya Congo, Félix-Antoine Tshisekedi Tshilombo. Abawugize biganjemo urubyiruko rukomoka mu Ntara ya Kasaï y’Iburasirazuba.

Mu itangazo ryasohowe n’ubuyobozi bw’iyo ntara, ryatangaje ko aba basirikare bahawe amahugurwa yihariye yo ku rwego rwo hejuru yatanzwe n’impuguke za gisirikare zo muri Israel, agamije kubategura gukora inshingano zisaba ubuhanga n’ubunyamwuga buhanitse.

Nyuma yo kurangiza ayo mahugurwa, biteganyijwe ko bazajya boherezwa mu bikorwa byihariye birimo kurinda ubusugire bw’igihugu, guhangana n’ibibazo by’umutekano ndetse no gukora ubutumwa bwihariye bwa gisirikare.

Iyi gahunda ije mu gihe FARDC ikomeje kongera ubushobozi bw’ingabo zayo, nyuma y’uko intambara iyihanganishije n’Ihuriro AFC/M23 n’abafatanyabikorwa baryo ikomeje gukaza umurego mu burasirazuba bwa Congo.

Kuva iyi mirwano yakongera gufata intera, FARDC yakunze kwifashisha imitwe y’abasirikare badasanzwe irimo Hiboux, Serpents Noirs, Ours n’indi, ariko imwe muri yo yagiye ihura n’imbogamizi ku rugamba, aho ingabo za Leta n’abafatanyabikorwa bazo zatsindiwe mu bice bitandukanye n’abarwanyi ba AFC/M23.

Mu ijambo yagejeje ku bitabiriye umuhango, Guverineri Jean-Paul Mbwebwa Kapo yashimye gahunda ya Perezida Félix Tshisekedi yo gukomeza kuvugurura no kongerera ubushobozi ingabo z’igihugu, avuga ko ari intambwe ikomeye mu kubaka igisirikare gikomeye kandi kinyamwuga.

Yanashishikarije urubyiruko rwo mu Ntara ya Kasaï y’Iburasirazuba gukomeza kwitabira gahunda yo kwinjira mu gisirikare, agaragaza ko hateganywa gutegurwa n’icyiciro cya kabiri cy’abasirikare bazinjira muri uwo mutwe wihariye.

Abasirikare barangije aya mahugurwa basabwe gukorera igihugu cyabo barangwa n’ikinyabupfura, ubunyamwuga, ubwitange n’ubunyangamugayo, mu rwego rwo kurushaho kubungabunga umutekano n’ubusugire bwa Repubulika Iharanira Demokarasi ya Congo.