Iburengerazuba: Imiryango hafi ibihumbi 3000 yimuwe mu rwego rwo kwirinda ibiza

Ibi bije mu gihe Ikigo cy’Igihugu gishinzwe Ubumenyi bw’Ikirere (Meteo Rwanda) cyatangaje ko mu gihe cy’Umuhindo wa 2026, kuva muri Nzeri kugeza mu Kuboza, hateganyijwe imvura iri hagati ya milimetero 300 na 1,000 mu bice bitandukanye by’igihugu, ikaba iri hejuru y’impuzandengo y’imvura isanzwe igwa muri iki gihe cy’umwaka.

Guverineri w’Intara y’Iburengerazuba, Ntibitura Jean Bosco, yagarutse ku ngamba zafashwe n’iyi ntara mu rwego rwo guhangana n’ingaruka zishobora guterwa n’imvura nyinshi, mu kiganiro n’itangazamakuru cyabereye ku biro by’intara.

Yagize ati: “Tumaze kwimura imiryango igera ku 2,900 yari ituye mu manegeka, tunubaka amasite 17 azifashishwa mu kwakira abaturage bashobora kwimurwa mu gihe habaye ibiza, kugira ngo turinde ubuzima bwabo kandi tugabanye ingaruka z’ibi biza.”

Meteo Rwanda igaragaza ko impuzandengo y’imvura isanzwe igwa mu Muhindo mu myaka nibura 30 ishize iri hagati ya milimetero 279 na 962. Iri teganyagihe rishingiye ku mpinduka z’ubushyuhe bwo mu Nyanja ya Pasifika no mu Nyanja y’Ubuhinde, zishobora kongera ubuhehere bw’umwuka ugera mu Rwanda.

Mu iteganyagihe ryayo, Meteo Rwanda yagaragaje ko imvura nyinshi iri hagati ya milimetero 800 na 1,000 iteganyijwe mu Karere ka Nyamasheke, mu burengerazuba bw’Uturere twa Karongi na Rutsiro, mu bice by’uburengerazuba n’amajyepfo bya Nyamagabe na Nyaruguru, ndetse no mu burasirazuba bwa Rusizi.

Ikigo kandi cyagaragaje ko Nzeri ishobora kurangwa n’imvura iri munsi y’impuzandengo isanzwe, ariko ikagenda yiyongera mu mezi akurikiraho. Ibi bisaba abaturage, cyane cyane abatuye mu duce dushobora kwibasirwa n’inkangu n’imyuzure, gukomeza gukurikiza inama zo kwirinda ibiza.

Guverineri w’Intara y’Iburengerazuba, Ntibitura Jean Bosco, yagarutse ku ngamba zafashwe n’iyi ntara mu rwego rwo guhangana n’ingaruka zishobora guterwa n’imvura nyinshi, mu kiganiro n’itangazamakuru cyabereye ku biro by’intara.

Yavuze ko muri izo ngamba harimo kwimura imiryango igera ku 2,900 yari ituye mu manegeka no kubaka amasite 17 ashobora kwakirirwamo abaturage igihe bibaye ngombwa ko bava mu byabo.

Ibi bikorwa bigamije kurinda ubuzima bw’abaturage no kugabanya ingaruka z’ibiza bishobora kwangiza amazu, ibikorwa remezo n’indi mitungo.

Ku rundi ruhande, Minisiteri ishinzwe Ibikorwa by’Ubutabazi (MINEMA) imaze igihe isaba inzego zitandukanye n’abaturage gukaza ingamba zo gukumira ibiza mbere y’uko imvura nyinshi igwa.

Mu bikorwa byo kwitegura igihe cy’imvura, ku wa 29 Kanama 2026, MINEMA yakanguriye abaturage hirya no hino mu gihugu kwitabira ibikorwa byo gukumira ibiza, birimo gusukura imiyoboro y’amazi, gukomeza ibisenge by’amazu, gushyiraho imirwanyasuri, ndetse no gutegura uburyo bwo gucunga amazi y’imvura.

Iyi Minisiteri kandi yasabye abaturage batuye mu duce dufite ibyago byinshi kwimuka hakiri kare bakajya ahantu hatekanye, aho gutegereza ko ibiza bibageraho. Yashimangiye ko kwirinda no kwitegura hakiri kare ari ingenzi mu kurengera ubuzima n’imitungo.

Muri Nzeri 2026, MINEMA yongeye kwibutsa abaturage bakiri mu manegeka ko bagomba kwimuka mu gihe bishoboka, nyuma y’imvura yaguye mu bice bitandukanye by’igihugu ku wa 13 Nzeri, ikangiza inzu 34 mu Murenge wa Rwimbogo mu Karere ka Gatsibo.

Mu gihe imvura nyinshi iteganyijwe mu bice bitandukanye by’igihugu, inzego zishinzwe gukumira ibiza zikomeje gushishikariza abaturage gukurikiza ubutumwa bw’iteganyagihe, kwirinda ibikorwa bishobora gushyira ubuzima bwabo mu kaga no gutanga amakuru ku bimenyetso bishobora kugaragaza ko ahantu hari ibyago by’ibiza.

Mu Ntara y’Iburengerazuba, aho Meteo Rwanda iteganya imvura nyinshi mu bice bimwe na bimwe, ibikorwa byo kwimura imiryango no gutegura amasite yo kwakirirwamo abahuye n’ibiza biri mu ngamba zishobora gufasha kugabanya ingaruka z’ibihe by’imvura.

Ubuyobozi bw’iyi ntara bukomeje  gukurikirana uko ingamba zashyizweho zishyirwa mu bikorwa, mu gihe abaturage na bo bakangurirwa kwitabira ibikorwa byo gukumira ibiza no kwita ku makuru atangwa n’inzego zibishinzwe.