Karongi: Umuganda w'urubyiruko wasize igisubizo ku iterambere ryarwo hehe n'icyuma

Ku rwego rw’Akarere, ibikorwa by’umuganda byabereye mu Murenge wa Rubengera, by’umwihariko mu Kagari ka Gacaca, aho abayobozi batandukanye bifatanyije n’urubyiruko muri iki gikorwa.

Uyu muganda wateguwe na Minisiteri y’Urubyiruko n’Ubuhanzi, ku bufatanye n’Inama y’Igihugu y’Urubyiruko ndetse n’Ubuyobozi bw’Akarere ka Karongi, ushyirwa mu bikorwa ku rwego rw’utugari.
Ibikorwa byibanzweho byari bigamije guteza imbere imibereho myiza y’abaturage. Harimo kubaka no gusana amazu y’imiryango itishoboye, gusibura imiyoboro y’amazi ndetse n’ibindi bikorwa bigamije guteza imbere imibereho y’abaturage.

Muri ibi bikorwa, hari abayobozi batandukanye bifatanyije n’urubyiruko, barimo Minisitiri w’Ubuzima, Dr. Sabin Nsanzimana, Guverineri w’Intara y’Iburengerazuba, Umuhuzabikorwa w’Inama y’Urubyiruko ku rwego rw’Akarere ndetse n’inzego z’umutekano.
Nyuma y’umuganda, urubyiruko rwitabiriye ikiganiro cyibanze ku nsanganyamatsiko igira iti:
“Irinde ibiyobyabwenge, wiheshe agaciro.”

Iki kiganiro cyagarutse ku ngaruka z’ibiyobyabwenge n’inzoga zitujuje ubuziranenge, ndetse n’uruhare rw’urubyiruko mu kubaka umuryango n’igihugu.
Guverineri w’Intara y’Iburengerazuba yashimiye urubyiruko rwitabiriye umuganda w’iki gihembwe, anarwibutsa ko kugira uruhare muri gahunda za Leta no mu bikorwa by’iterambere ari inshingano ya buri muturage.
Yashimangiye kandi ko urubyiruko rufite uruhare rukomeye mu kubaka u Rwanda, ariko ko ibiyobyabwenge bishobora kuba imbogamizi kuri iyo nshingano.
Mu butumwa bwe, yagize ati: “Ntushobora kubaka u Rwanda warabaswe n’ibiyobyabwenge, kuko icyuma kirakeba.”
Yasabye urubyiruko kwirinda ibiyobyabwenge, inzoga zitujuje ubuziranenge ndetse n’indi myitwarire ishobora kugira ingaruka ku buzima n’umutekano.

Guverineri kandi yagarutse ku bijyanye no kwihangira imirimo, asaba urubyiruko kubyaza umusaruro amahirwe ahari, kugira ngo rubashe kwiteza imbere no guteza imbere imiryango yarwo rwirinda ubbusinzi n'inzoga zitujuje ubuzirantenge.
Yashishikarije urubyiruko gukunda umurimo, kugira intego ndetse no gutegura neza ejo hazaza.
Yanarusabye gutanga amakuru ku bantu cyangwa ibikorwa binyuranyije n’amategeko, cyane cyane ibijyanye n’ibiyobyabwenge n’inzoga zitujuje ubuziranenge, kuko bishobora kugira ingaruka ku buzima bw’abaturage n’umutekano rusange.

Yongeye gushimangira ko ibibazo bibangamiye abaturage bishobora gukemurwa neza binyuze mu bufatanye, ubumwe no kugira uruhare muri gahunda zigamije iterambere.
Minisitiri w’Ubuzima, Dr. Sabin Nsanzimana, na we yagarutse ku kibazo cy’inzoga zitujuje ubuziranenge, ashimangira ko ari ikibazo gikomeye ku buzima bw’abaturage.
Yavuze ko iyo hatabaho ingamba zo guca inzoga zitujuje ubuziranenge, ingaruka ku buzima bw’Abanyarwanda zari kuba nyinshi.

Mu ijambo rye, yavuze ko mu Rwanda hari inzoga zitujuje ubuziranenge zingana na litiro zisaga miliyoni 20, mu gihe abaturage b’u Rwanda bangana na miliyoni 14.

Yifashishije iyo mibare, yagaragaje uburemere bw’ikibazo cy’izo nzoga n’ingaruka zishobora kugira ku buzima bw’abaturage.

Minisitiri kandi yavuze ko ibikorwa byo kurwanya no gukuraho izo nzoga bizakomeza, anaburira abazihishe mu ngo ko na bo bazagerwaho zigafatwa.

Mbere na Nyuma y’ibiganiro, urubyiruko rwasusurukijwe n’abahanzi batandukanye barimo Davis D na Bwiza, ndetse n’umunyarwenya Mucunyi.
Iki gikorwa cy’umuganda w’urubyiruko cyabaye umwanya wo guhuza ibikorwa by’iterambere ry’abaturage, ubukangurambaga bwo kwirinda ibiyobyabwenge ndetse no gushishikariza urubyiruko kugira uruhare rugaragara mu iterambere ry’igihugu.