Minisitiri Olivier Nduhungirehe ari mu ruzinduko rw’akazi muri Tanzania

Nk’uko byatangajwe na Minisiteri y’Ububanyi n’Amahanga n’Ubutwererane y’u Rwanda ibinyujije ku rubuga rwa X, aba bayobozi bombi bagiranye ibiganiro byibanze ku gukomeza guteza imbere no gushimangira umubano usanzwe urangwa n’ubucuti n’ubufatanye hagati y’u Rwanda na Tanzania.

Ibiganiro byabo byagarutse ku ngingo zitandukanye zigamije kurushaho guteza imbere ubufatanye bw’ibihugu byombi mu nzego zinyuranye, harimo dipolomasi, ubukungu, ubucuruzi n’izindi nzego zifitiye inyungu abaturage b’ibihugu byombi.

Uru ruzinduko rwa Minisitiri Olivier Nduhungirehe rugamije gukomeza gutsimbataza umubano mwiza usanzwe uhuza u Rwanda na Tanzania, ndetse no kurebera hamwe uburyo bwo kurushaho kwagura ubufatanye mu nyungu z’ibihugu byombi no mu rwego rwo guteza imbere ukwishyira hamwe kw’Afurika y’Iburasirazuba.