Polisi ya Kinshasa yatangije ibikorwa byo guhiga abagurisha ibiyobyabwenge

Gasisi Enock 02 Oct 2026 Hashize Ibyumweru 2 34 views 0 ibitekerezo

Polisi ya Repubulika Iharanira Demokarasi ya Congo yatangiye ibikorwa byo kurwanya icuruzwa n’ikoreshwa ry’ibiyobyabwenge mu Mujyi wa Kinshasa, yohereza amatsinda yihariye mu bikorwa byo gufata ababicuruza.

Guhera ku wa Kabiri, tariki ya 29 Nzeri 2026, amatsinda y’abapolisi azwi nka Alpha na West Mobile Intervention Groups (GMI) yatangiye ibikorwa byo kugenzura no gufata abacuruza ibiyobyabwenge, by’umwihariko ahakunze gukorerwa ibikorwa byo kubikwirakwiza.

Ibi bikorwa bije mu gihe hagaragaye ubwiyongere bw’ikoreshwa nabi ry’imiti imwe n’imwe n’urubyiruko rwo muri uyu mujyi. Muri iyo miti harimo uruvange rw’imiti itandukanye, irimo n’imiti igabanya ububabare ikoreshwa ku rugero rurenze urwo yagenewe, ruzwi ku izina rya “Mpuku amemi freezer.”

Bamwe mu rubyiruko basabye Leta gushyiraho amabwiriza akomeye agenga iy’igurishwa ry’iyo miti muri farumasi, ku buryo yatangwa ari uko umuntu afite urupapuro rwa muganga ruyimwandikiye.

Umwe mu rubyiruko yagize ati: “Leta ya Congo igomba gushyiriraho abacuruza imiti amabwiriza yo kuyitanga ari uko umuntu afite urupapuro rwa muganga, kuko iyi miti iri kwangiza urubyiruko.”

Abandi bagaragaje ko hakenewe no gushyiraho gahunda zitanga akazi ku rubyiruko, kugira ngo rugire ibindi bikorwa birufasha kwiteza imbere aho kwishora mu biyobyabwenge.

Urubyiruko rwagaragaje ko ikoreshwa ry’ibi biyobyabwenge n’ibinyobwa byangiritse bishobora guteza ibibazo bikomeye ku buzima, birimo kwangirika k’umwijima n’impyiko, kugabanuka k’ubushobozi bwo kwibuka ndetse n’ibibazo byo mu mitekerereze.

Polisi yatangaje ko izakomeza ibikorwa byo gucunga umutekano, gukora amarondo no gufata abakekwaho gucuruza ibiyobyabwenge, kugira ngo bashyikirizwe inzego z’ubutabera zibifitiye ububasha.