RDC na AFC/M23 batangiye ibikorwa byo kugenzura iyubahirizwa ry’agahenge

Kuri uyu wa 16 Nyakanga 2026, impuguke zatoranyijwe n’impande zombi, ari zo Guverinoma ya Kinshasa na AFC/M23, zakiriwe n’Umugaba w’Ingabo uyoboye EJVM+ i Goma, aho zatangiriye inshingano zo gukurikirana uko agahenge kari kubahirizwa.

Mu ijambo yabagejejeho, Umugaba wa EJVM+ yabifurije ikaze, abasobanurira inshingano z’uru rwego zirimo kugenzura niba impande zihanganye zubahiriza agahenge, hagamijwe guteza imbere amahoro arambye no kugabanya impungenge abaturage bamaze igihe bafite kubera umutekano muke mu burasirazuba bwa RDC.

Yanashimangiye ko MCVE+ izakora mu bwisanzure, mu mucyo no mu buryo butabogamye, asaba impuguke ziturutse ku mpande zombi gukora akazi kazo kinyamwuga no kubahiriza amahame agenga inshingano bahawe.

Yavuze ko ibikorwa byo kugenzura bitazashingira ku nyungu za politiki cyangwa ku gitutu icyo ari cyo cyose, ahubwo ko bizashingira gusa ku bimenyetso bifatika n’ukuri kuzagaragara mu iperereza n’igenzura rizakorwa.

Itangira ry’imirimo ya MCVE+ rifatwa nk’intambwe ikomeye mu ishyirwa mu bikorwa ry’amasezerano y’agahenge hagati ya Guverinoma ya RDC na AFC/M23. Ni gahunda igamije kongerera icyizere impande zombi no gushyigikira inzira y’ibiganiro, mu rwego rwo kugarura amahoro n’umutekano birambye mu burasirazuba bwa Repubulika Iharanira Demokarasi ya Congo.

Abasesenguzi bemeza ko imikorere myiza y’uru rwego ishobora kugira uruhare rukomeye mu kugabanya ubushyamirane no gufasha impande zombi kubahiriza ibyo ziyemeje, bityo abaturage bakongera kubona ituze nyuma y’igihe kirekire cy’umutekano muke.