RDC yitabaje Misiri ngo iyifashe kuzamura ubunyamwuga bw’igisirikare cyayo

Ibiganiro byabereye i Cairo byibanze ku nzego zitandukanye z'ubufatanye, zirimo guhugura abasirikare n'abofisiye ba FARDC, kongerera ubushobozi imitwe yihariye y'igisirikare, kuvugurura amashuri ya gisirikare, gusangira ubumenyi mu bijyanye n'ubwubatsi bwa gisirikare (military engineering), ndetse no kunoza gahunda z'amahugurwa.

Ubuyobozi bwa Misiri bwagaragaje ubushake bwo gufasha Kinshasa gushyira mu bikorwa iyi gahunda, igamije kuzamura urwego rw'imikorere n'ubunyamwuga bw'Ingabo za FARDC.

Mu ruzinduko yagiriye muri Misiri kuva ku wa 8 kugeza ku wa 11 Nyakanga 2026, Minisitiri w’Ingabo n’Abahoze ku Rugerero wa RDC, Guy Kabombo Muadiamvita, yasuye ahantu hatandukanye hafite amateka akomeye mu gisirikare cya Misiri.

Yashyize indabo ku mva y'umusirikare utazwi ndetse anasura urwibutso rw'abasirikare baguye ku rugamba, kimwe mu bimenyetso bikomeye byubahirizwa n'Ingabo za Misiri.

Itsinda ryaturutse muri RDC ryanasuye ibigo bya gisirikare ndetse rireba ibikoresho n'ikoranabuhanga rikoreshwa n'Ingabo za Misiri mu bikorwa byazo bya buri munsi.

Mu rugendo rwe, Guy Kabombo yari aherekejwe n'itsinda ry'abasirikare bakuru barimo abajenerali n'abayobozi b'amashuri atanga amahugurwa ya gisirikare muri FARDC.

Yagiranye ibiganiro na mugenzi we wa Misiri, Lt. Gen. Ashraf Salem Zaher, amugezaho ibyifuzo bine by'ingenzi RDC yifuza ko byashingirwaho mu bufatanye bwa gisirikare hagati y'ibihugu byombi. Birimo kongera ubumenyi bw'abasirikare, kuvugurura uburyo bw'imyitozo no kunoza imikorere y'ingabo.

Delegasiyo ya Congo yanasuye Ishuri Rikuru rya Gisirikare rya Misiri, rizwiho gutanga amahugurwa yo ku rwego rwo hejuru ku basirikare bakuru. Ubuyobozi bwa RDC bwatangaje ko ibikorwa remezo n'uburyo iryo shuri rikora bishobora kubera igihugu icyitegererezo mu kuvugurura ibigo by'amahugurwa bya FARDC.

Aya masezerano y'ubufatanye ari mu murongo wa gahunda ya Guverinoma ya RDC yo kuvugurura urwego rw'igisirikare no kugiha ubushobozi bujyanye n'ibibazo by'umutekano igihugu gihanganye na byo.

Muri uru ruzinduko kandi, Minisitiri w'Intebe wa RDC, Judith Suminwa Tuluka, ni we uyoboye ubutumwa bw'igihugu muri Misiri bugamije gushaka abafatanyabikorwa bazafasha mu ivugururwa ry'Ingabo za Congo.

Ibi bibaye nyuma y'igihe gito Perezida Félix Tshisekedi na we agiriye uruzinduko muri Misiri, rugamije kurushaho gushimangira umubano n'ubufatanye hagati y'ibihugu byombi.