RDF yungutse abasirikare bashya basoje amahugurwa y'ibanze ya gisirikare i Nasho

Umuhango wo gusoza ayo mahugurwa wayobowe n’Umugaba Mukuru w’Ingabo z’u Rwanda, Gen Mubarakh Muganga, witabirwa n’abajenerali, ba ofisiye bakuru n’abato, ndetse n’abandi basirikare bo mu nzego zitandukanye za RDF.

Muri uwo muhango, abasirikare bashya bagaragaje ubumenyi n’ubushobozi bungukiye mu gihe cy’amahugurwa, birimo gukoresha intwaro mu buryo bunoze, kurasa bahamya intego, ndetse no gukora imyitozo itandukanye ya gisirikare igaragaza ko biteguye kuzuza inshingano zo kurinda igihugu.

Gen Mubarakh Muganga yashimiye aba basirikare ku bwihangane, ubwitange n’umurava bagaragaje mu gihe cyose bamaze batozwa, abakira ku mugaragaro mu muryango mugari wa RDF.

Yabashishikarije gukoresha neza ubumenyi bungutse mu kurinda ubusugire bw’u Rwanda no kubungabunga umutekano w’Abanyarwanda, abibutsa ko inshingano zabo zisaba ubunyamwuga, ubwitange n’ubudahemuka.

Mu butumwa yabagejejeho, Gen Muganga yongeye kubasubiriramo impanuro zatanzwe na Perezida Paul Kagame, akaba n’Umugaba w’Ikirenga w’Ingabo z’u Rwanda, ubwo yagiranaga ibiganiro n’Intore zigize icyiciro cya 16 cy’Itorero Indangamirwa.

Yabasabye gukomeza kubungabunga Ikinyarwanda, umuco nyarwanda, indangagaciro n’imigenzo by’u Rwanda, no guhora biteguye guhangana n’ikintu cyose cyahungabanya umutekano n’ubusugire bw’igihugu.

Yongeye kubakangurira kwirinda imyitwarire idahwitse irimo ubunebwe, amacakubiri, imvugo zibiba urwango, ubusinzi n’ubusambanyi, ashimangira ko imyitwarire myiza ari kimwe mu biranga umusirikare w’umwuga.

Umugaba Mukuru wa RDF yabibukije ko amahugurwa y’ibanze barangije ari intangiriro y’urugendo rwabo rwa gisirikare, agaragaza ko bazakomeza guhabwa andi mahugurwa agamije kongera ubumenyi n’ubushobozi, hakurikijwe impinduka n’ibikenewe mu nshingano z’Ingabo z’u Rwanda.

Yabasabye gukomeza kubahiriza amahame, icyerekezo n’indangagaciro za RDF, kugira ngo bakomeze kubaka igisirikare kirangwa n’ubunyamwuga, ubushobozi n’ikinyabupfura.

Mu gusoza ijambo rye, Gen Mubarakh Muganga yashimiye ubuyobozi bw’Ikigo cy’Amahugurwa cya Gisirikare cya Nasho, by’umwihariko abarimu n’abatoza, ku ruhare bagize mu gutegura neza aba basirikare bashya, abazaba bagize umusanzu ukomeye mu kurinda no kurengera u Rwanda.