Rutsiro: Ku Umunsi w'umugore wo mucyaro imiryango itishoboye yahawe inkunga zitandukanye

Iki gikorwa cyabaye ku wa Kane, tariki ya 15 Ukwakira 2026, cyitabirwa n’abaturage baturutse mu tugari no mu mirenge itandukanye yegereye Boneza. Cyari gifite insanganyamatsiko igira iti: “Uruhare rw’umugore wo mu cyaro, umusingi w’impinduka zirambye.”

Mu bikorwa byaranze uyu munsi harimo kuremera imiryango itishoboye, koroza abaturage no gushishikariza abagore kwitabira ibigo by’imari kugira ngo babashe kwiteza imbere.

Mu nkunga zatanzwe, abagore batatu bahawe matelas, ababyeyi 13 bahabwa ibitenge, naho imiryango 12 ihabwa umuceri, buri muryango uhabwa umufuka w’ibiro 25. Hatanzwe kandi inka muri gahunda ya Girinka, irimo iyahawe umuturage wo muri Boneza witwa Mureshyankwano.

Eugenie, umukobwa ubana n’ubumuga, na we yahawe igishoro cyo kumufasha kwiteza imbere.

Abagore bashishikarijwe kwitabira ibigo by’imari

Muri ibi birori, abagore bo muri Boneza bashishikarijwe kugana ibigo by’imari na SACCO, bakizigamira kandi bagasaba inguzanyo zabafasha guteza imbere imishinga yabo.

Byagaragajwe ko umubare w’abagore bo muri uyu murenge bitabira serivisi z’ibigo by’imari ukiri hasi, bityo hakaba hakenewe kubakangurira kurushaho gukoresha izi serivisi mu kwiteza imbere.

Abagore bayobora imidugudu bitwaye neza bahawe Certificate (ishimwe)zo kubashimira, ziherekejwe n’amabahasha y’ishimwe. Hatanzwe kandi Certificate zo gushimira bamwe mu bagize komite y’Akarere (CNF).

Umuyobozi w’Akarere yashimangiye ubushobozi bw’umugore

Umuyobozi w’Akarere ka Rutsiro, Kayitesi Dative, yashimye uruhare rw’abagore mu iterambere ry’imiryango n’igihugu, abasaba gukomeza kwizera ubushobozi bwabo no kububyaza umusaruro.

Yagaragaje ko umugore ushoboye kandi uharanira iterambere ry’umuryango agira uruhare rukomeye mu iterambere ry’igihugu muri rusange.

Uyu munsi wahurije hamwe abagore n’abaturage mu bikorwa bigamije kubafasha kwiteza imbere, kunoza imibereho y’imiryango itishoboye no gushimangira uruhare rw’umugore wo mu cyaro mu iterambere ry’umuryango.