Rutsiro: Umugabo yatemye umugore we mu musaya, ageragez a no kwiyahura

Gasisi Enock 03 Oct 2026 Hashize Ibyumweru 2 117 views 0 ibitekerezo

Umugabo w’imyaka 37 wo mu Kagari ka Bumba, Umurenge wa Mushubati, mu Karere ka Rutsiro, yatemye umugore we w’imyaka 42 mu musaya aramukomeretsa, nyuma agerageza kwiyahura mu Kiyaga cya Kivu.

Uyu mugabo yafatiwe mu Kagari ka Kasure ari kugerageza kwiyambura ubuzima, mu gihe umugore we yajyanywe mu Bitaro bya Murunda kugira ngo ahabwe ubuvuzi.

Ibi byabaye mu ijoro ryakeye, ubwo uyu mugabo yakomeretsaga umugore we amutemye mu musaya. Nyuma y’icyo gikorwa, yerekeje ahagana ku Kiyaga cya Kivu agerageza kwiyahura, ariko aza gufatirwa mu Kagari ka Kasure.

Umunyamabanga Nshingwabikorwa w’Akagari ka Bumba, Uwamahoro Beata, yemeje iby’aya makuru, avuga ko umugore wakomeretse yahise ajyanwa mu Bitaro bya Murunda, mu gihe umugabo we yamaze gutabwa muri yombi.

Uyu muyobozi yasabye abaturage kwirinda amakimbirane yo mu miryango ashobora kuvamo urugomo n’ibindi bikorwa bishyira ubuzima mu kaga.

Yagize ati: “Amakimbirane ntakwiye mu muryango. Iyo abantu bananiwe kumvikana, bakwiye kugana inzego zibishinzwe, kandi n’iyo ikibazo kikiri mu rwego rwo gukemurwa, bakagana inzego z’ibanze zikabafasha kugishakira umuti.”

Uwamahoro yasabye kandi imiryango ifite ibibazo kutareka amakimbirane ngo akomere, ahubwo ikajya ishaka ubufasha hakiri kare, kugira ngo hirindwe ibikorwa bishobora guteza igihombo cy’ubuzima cyangwa izindi ngaruka zikomeye.

Kugeza ubu, icyateye uyu mugabo gutema umugore we ntikiratangazwa. Nta makuru arambuye aratangazwa ku miterere y’ibikomere by’uyu mugore cyangwa ku byavuye mu iperereza ku byabaye.

Uyu mugabo ari mu maboko y’inzego zishinzwe umutekano mu gihe iperereza rikomeje kugira ngo hamenyekane neza uko ibyabaye byagenze n’impamvu yabiteye.