Amateka: Umunsi abasirikare bakuru umunani ba Ex-FAR bamagana Jenoside mu ibaruwa bandikiye ku Kigeme

Iyi baruwa yandikiwe i Kigeme, mu cyahoze ari Perefegitura ya Gikongoro, mu gihe ingabo za RPA zari zimaze kubohora ibice byinshi by’u Rwanda birimo n’Umujyi wa Kigali.

Muri icyo gihe, ibice bya Zone Turquoise, birimo Kibuye, Cyangugu na Gikongoro, byagenzurwaga n’ingabo z’Abafaransa. Ni ibice byakomeje gukoreshwa nk’inzira yo guhungishirizamo abasirikare ba Ex-FAR n’abagize Interahamwe, bamwe muri bo bakomeje ibikorwa byo kwica Abatutsi.

Iyi baruwa yashyizweho umukono n’abasirikare bakuru barimo Marcel Gatsinzi, Léonidas Rusatira, Venant Musonera, Froduald Mugemanyi, Emmanuel Habyarimana, Cyriaque Habyarabatuma, Alex Rwabukwisi na Jeanne Ndamage.

Muri iyo nyandiko y’amapaji abiri, aba basirikare bamaganye Jenoside, ivanguramoko, ihohoterwa, ivangura n’ibindi bikorwa byari bishyigikiwe n’ubuyobozi bwari buriho icyo gihe. Banasabye bagenzi babo bo muri Ex-FAR kwitandukanya n’ibikorwa bya Jenoside no gushyigikira amahoro, ubutabera n’ubumwe bw’Abanyarwanda.

Bagize bati: "Twamaganye umugambi uwo ari wo wose wo gucamo ibice Abanyarwanda, turanenga ubutegetsi n’itangazamakuru byari bikwirakwiza icengezamatwara ryo kumena amaraso. Twamaganye twivuye inyuma Jenoside n’ibindi byaha byibasira inyokomuntu mu gihugu cyacu kandi dutangaje ko twiteguye gukorana n’ababifitemo ubushake bose mu kurwanya Jenoside n’ivanguramoko."

Iyi baruwa yabaye imwe mu nyandiko z’ingenzi zagaragaje ko hari bamwe mu basirikare ba Ex-FAR batemeranyaga n’ibikorwa bya Jenoside ndetse bagahitamo kubyamagana ku mugaragaro.

Nyuma y’uko Jenoside ihagaritswe n’Ingabo za RPA, abasirikare ba Ex-FAR bagera ku 1,500 bemeye kwinjira mu rugendo rwo kubaka ubumwe bw’Abanyarwanda. Bahawe amahugurwa n’inyigisho z’amezi abiri ku mahame ya FPR-Inkotanyi, mbere yo kwinjizwa mu RDF (Rwanda Defence Force), mu rwego rwo kubaka igisirikare kimwe cyunze ubumwe.