Dutemberane Bethany Hotel: Ahantu ho kuruhukira no kwishimira ubwiza bw’Ikiyaga cya Kivu

Bethany Hotel iherereye ahantu hafite umwihariko wo gutuma abahagera babasha kwishimira ubwiza bw’Ikiyaga cya Kivu, bakagira umwanya wo kuruhuka no gusabana, mu gihe basuye Akarere ka Karongi n’utundi duce two mu Burengerazuba bw’u Rwanda.

Aha ni ahantu hashobora kugirira akamaro abantu bakeneye kuruhuka, abari mu ngendo z’akazi, ba mukerarugendo ndetse n’abashaka ahantu ho gutegurira ibirori bitandukanye.

Bethany Hotel ifite amateka maremare, kuko yatangiye gukora mu mwaka wa 1982, ikaba imaze imyaka isaga 40 ikorera muri aka gace.

Iyi hoteli iri muri Bethany Investment Group, ikigo cyashinzwe mu mwaka wa 2011, gifite ibikorwa n’amashami mu bice bitandukanye by’u Rwanda.

Umuyobozi wa Bethany Investment Group, Ntwali Janvier, avuga ko Bethany Hotel ari kimwe mu bikorwa by’ingenzi by’iki kigo, ndetse ko ifite umwihariko ukomeye ushingiye ku mwanya iherereyemo.

Bethany Hotel kandi ifitanye amateka na Église Presbytérienne au Rwanda, ari na yo yashyizeho ibikorwa byayo mu myaka yashize.

Umwihariko ukomeye wa Bethany Hotel ni aho iherereye mu Murenge wa Bwishyura, ahantu umuntu ashobora kubona neza Ikiyaga cya Kivu kandi akishimira amahumbezi yaho.

Uhasanga ahantu ho kwicara no kuruhukira ureba ikiyaga, bigatuma iyi hoteli iba imwe mu hantu umuntu ashobora kwifashisha mu gihe ashaka kuruhuka cyangwa gutembera muri Karongi.

Bethany Hotel kandi itanga amahirwe yo gutembera mu Kiyaga cya Kivu, bikaba ari kimwe mu bikorwa bishobora kongera umunezero w’abashyitsi bayigana.

Nk’uko ubuyobozi bwa Bethany Hotel bubivuga, iyi hoteli ifite amacumbi, resitora ndetse n’ahantu ho kwakirira ibirori bitandukanye.

Yakira abantu bagiye mu bikorwa by’akazi, inama, ubukerarugendo ndetse n’abashaka ahantu ho kuruhukira.

Ku bijyanye n’ibirori, Bethany Hotel ishobora kwakira ibikorwa birimo ubukwe, inama n’ibindi birori, aho ubuyobozi bwayo buvuga ko ifite ubushobozi bwo kwakira abantu benshi, bugera ku barenga 2,000 bitewe n’ubwoko bw’igikorwa n’imiterere yacyo.

Iyi hoteli kandi yakira abashaka gutegura ibihe byihariye, harimo marriage proposal, ku bashaka gusaba abo bakundana kubana.

Ntwali Janvier, Umuyobozi wa Bethany Investment Group, avuga ko iki kigo cyashinzwe mu mwaka wa 2011, kikaba gifite amashami atandukanye mu gihugu.

Avuga ko ibikorwa byacyo biboneka mu bice bitandukanye birimo Umujyi wa Kigali, Nyagatare, Rubavu na Karongi, aho Bethany Hotel iherereye.

Ibi bituma Bethany Investment Group ikomeza kugira ibikorwa mu bice bitandukanye by’igihugu, mu gihe Bethany Hotel ikomeje kuba kimwe mu bikorwa byayo bifite amateka maremare.

Mu rwego rwo kumenyekanisha amahoteri n’ahantu nyaburanga byo mu Ntara y’Iburengerazuba, IMENA PRESS RWANDA yahisemo kugeza ku abanyarwanda n’abanyamahanga amakuru ku hantu hatandukanye umuntu ashobora gusura, kuruhukira no kwishimira ibyiza by’aka gace.

Bethany Hotel ni hamwe mu hantu twasuye muri uru rugendo, by’umwihariko kubera umwanya iherereyemo hafi y’Ikiyaga cya Kivu ndetse na serivisi zitandukanye ihereza abayigana.

Niba uteganya gusura Akarere ka Karongi cyangwa ibindi bice by’Iburengerazuba bw’u Rwanda, Bethany Hotel ni hamwe mu hantu ushobora kureba nk’ahantu ho kuruhukira, gucumbika, gusangira, gukora inama cyangwa gutegurira ibirori.

Urugendo rwa IMENA PRESS RWANDA rurakomeza. Hari andi mahoteri n’ahantu nyaburanga byo mu Ntara y’Iburengerazuba tuzakomeza gusura no kumenyekanisha, mu rwego rwo kugeza ku bakunzi bacu amakuru ku byiza, serivisi n’amahirwe biboneka muri aka gace k’u Rwanda.