Ibitero byahinduye isura y’urugamba rwa M23: Kuva Bunagana kugera Goma na Bukavu

Kuva icyo gihe, M23 yagiye ihindura isura y’intambara mu Ntara za Kivu y’Amajyaruguru na Kivu y’Amajyepfo, ifata ibice byinshi bifite akamaro mu rwego rwa gisirikare n’ubukungu.

Werurwe–Kamena 2022: Intangiriro z’urugamba

Nyuma yo kongera gufata intwaro, M23 yatangiye ibitero ku birindiro by’ingabo za FARDC mu bice bya Rutshuru. Imirwano yabereye cyane muri Chanzu, Runyonyi na Rutshuru, aho uyu mutwe watangiye kwigarurira uduce dutandukanye.

Bunagana iba intsinzi ya mbere ikomeye

Ku wa 13 Kamena 2022, M23 yafashe umujyi wa Bunagana, umupaka ukomeye uhuza RDC na Uganda.

Ifatwa rya Bunagana ryahaye uyu mutwe ubushobozi bwo kugenzura imwe mu nzira zikomeye z’ubucuruzi n’urujya n’uruza rw’abantu n’ibicuruzwa hagati y’ibihugu byombi.

Ukwakira 2022: M23 yigarurira Rutshuru

Mu mpera z’Ukwakira 2022, M23 yagabye ibitero bikomeye byatumye ifata Rumangabo, Kiwanja na Rutshuru.

Ifatwa rya Rumangabo, ahari ikigo gikomeye cya gisirikare, ndetse n’umujyi wa Rutshuru, ryatumye M23 igenzura igice kinini cy’akarere, bituma imiryango mpuzamahanga yongera gusaba impande zihanganye guhagarika imirwano.

2023: Kwaguka muri Masisi na Lubero

Mu ntangiriro za 2023, M23 yakomeje kwagura ibice igenzura.

Ku wa 27 Mutarama 2023, yafashe Kitshanga, agace gafite akamaro gakomeye muri Teritwari ya Masisi. Nyuma yaho, imirwano yakomeje mu bice bya Mushaki na Mweso, bituma uyu mutwe urushaho kwegera inzira ziganisha mu mujyi wa Goma.

2024: Kwigarurira ibice bifite umutungo kamere n’inzira z’ingenzi

Umwaka wa 2024 waranzwe n’ibikorwa bya gisirikare byagutse.

Ku wa 30 Mata 2024, M23 yafashe Rubaya, agace kazwiho ubucukuzi bwa coltan, imwe mu mabuye y’agaciro akoreshwa mu gukora ibikoresho by’ikoranabuhanga.

Nyuma, ku wa 27 Kamena 2024, uyu mutwe wafashe Kanyabayonga, umujyi w’ingenzi uhuza Teritwari za Rutshuru na Lubero.

Mutarama 2025: Goma ifatwa

Hagati ya 26 na 27 Mutarama 2025, abarwanyi ba M23 binjiye mu mujyi wa Goma, umwe mu mijyi minini yo mu burasirazuba bwa RDC.

Ifatwa rya Goma ryabaye imwe mu ntsinzi zikomeye uyu mutwe wagezeho kuva watangira ibikorwa byawo, kuko uyu mujyi ari ihuriro ry’ubucuruzi, ibikorwa by’imiryango mpuzamahanga ndetse n’imihanda ihuza ibice bitandukanye by’igihugu.

Gashyantare 2025: Bukavu na yo yigarurirwa

Nyuma yo gufata Goma, M23 yakomeje ibikorwa byayo mu Ntara ya Kivu y’Amajyepfo.

Hagati ya 14 na 16 Gashyantare 2025, abarwanyi bayo binjiye mu mujyi wa Bukavu nyuma yo gufata ikibuga cy’indege cya Kavumu.

Ifatwa rya Bukavu ryatumye M23 igenzura imijyi ibiri ikomeye yo mu burasirazuba bwa RDC, ari yo Goma na Bukavu.

Imirwano yerekeza i Uvira

Nyuma y’aho, ibikorwa bya gisirikare byakomereje mu majyepfo ya Kivu y’Amajyepfo, aho M23 yageze mu bice byegereye Uvira. Icyakora, ibikorwa byayo muri ako karere byaje guhura n’igitutu cya gisirikare ndetse n’icya dipolomasi.

Mu gihe kitageze ku myaka ine, M23 yavuye ku bitero byibasiye ibirindiro bya gisirikare muri Rutshuru igera ku rwego rwo kugenzura ibice byinshi by’ingenzi birimo Bunagana, Rumangabo, Rutshuru, Kitshanga, Rubaya, Kanyabayonga, Goma na Bukavu.

Uku kwaguka kwahinduye cyane isura y’umutekano mu burasirazuba bwa Repubulika Iharanira Demokarasi ya Congo, bituma amakimbirane yo muri aka karere aba imwe mu mbogamizi zikomeye z’umutekano muri Afurika yo Hagati no mu Karere k’Ibiyaga Bigari.