Benno View na Kaasha 24 Gati’Ki bagiye gushyira hanze indirimbo nshya “Abagome”

Benno View yabitangaje abinyujije ku mbuga nkoranyambaga ze, agaragaza ko ari umushinga mushya ahuriyeho na Kaasha 24 Gati’Ki, ugamije kugeza ku bakunzi b’umuziki ubutumwa bujyanye n’imibanire iri mu ruganda rw’imyidagaduro.

Nk’uko byatangajwe, iyi ndirimbo izagaruka ku ishyari n’urwango bivugwa ko bigaragara mu ruganda rw’umuziki nyarwanda. Ni ubutumwa aba bahanzi bateganya kugeza ku bakunzi babo binyuze mu bihangano byabo.

Nubwo ibisobanuro birambuye ku butumwa buri muri buri gace k’indirimbo bitaratangazwa, izina “Abagome” n’insanganyamatsiko yayo bitegerejweho gukurura ibiganiro mu bakunzi b’umuziki nyarwanda.

Iyi ndirimbo nshya igiye gusohoka nyuma y’izindi ndirimbo za Benno View zirimo “Momo”, imaze kurebwa n’abarenga ibihumbi 290 kuri YouTube, ndetse na “Sepela”, yakoranye na Stivo Brown, imaze kurebwa n’abarenga ibihumbi 20.

Iyi mibare igaragaza uko izo ndirimbo zakurikiwe kuri YouTube, mu gihe abakunzi b’uyu muhanzi bategereje kumva icyo azanye muri uyu mushinga mushya ahuriyeho na Kaasha 24 Gati’Ki.

Abakoze kuri iyi ndirimbo

Mu Gutegura “Abagome”, amajwi yakozwe na Big Fafa, mu gihe kuvanga no kunoza amajwi (mixing and mastering) byakozwe na Tell Dhem . Iyi ndirimbo yakorewe muri GS Music, ihuzwa na Govy Star.

Mu gihe hategerejwe ko ishyirwa hanze, abakunzi ba Benno View na Kaasha 24 Gati’Ki bazamenya neza ubutumwa aba bahanzi bashyize muri iyi ndirimbo n’uko bazanye igitekerezo cyabo ku bibazo by’ishyari n’urwango mu muziki nyarwanda.