Burundi: Perezida Ndayishimiye yakiriye abatavuga rumwe na leta ya RDC nkuko yabisabwe na Tshisekedi

Mu babonanye na Perezida Ndayishimiye ku wa Mbere, tariki ya 6 Nyakanga 2026, harimo intumwa z'Itorero rya Réveil, iza National Episcopal Conference of Congo, iza Church of Christ in the Congo, ndetse n'itsinda rya C64.

Buri tsinda ryabanje kugirana ibiganiro byihariye na Perezida w'u Burundi mbere y'uko ahuza intumwa zose mu nama rusange.

Ibiganiro byibanze ku kurebera hamwe uburyo hakomeza gushakwa ibisubizo bya politiki ku bibazo bimaze igihe muri RDC, by'umwihariko ibijyanye n'umutekano muke ukomeje kugaragara mu burasirazuba bw'icyo gihugu.

Ni ibiganiro bibaye mu gihe ibibazo by'umutekano muri RDC bikomeje kuba ingorabahizi, aho hakomeje kuba imirwano hagati y'ingabo za Leta n'imitwe yitwaje intwaro ikorera muri ako karere.

Mu cyumweru gishize, hakwirakwiye amakuru yavugaga ko Perezida wa RDC, Félix Tshisekedi, yasabye mugenzi we Évariste Ndayishimiye kumufasha kuganiriza bamwe mu batavuga rumwe n'ubutegetsi bwe.

Aya makuru yavugaga ko ibiganiro byari bigamije kugabanya ubushyamirane bwa politiki bukomeje kwiyongera muri RDC, aho abatavuga rumwe na Leta bakomeje kwamagana umugambi wo guhindura Itegeko Nshinga, bavuga ko ushobora gutuma Perezida Tshisekedi yongera kwiyamamariza indi manda.

Kugeza ubu, nta ruhande ruratangaza ku mugaragaro ibyemezo byafatiwe muri ibi biganiro, gusa impande zitandukanye zikomeje gushimangira ko ibiganiro bya politiki ari imwe mu nzira z'ingenzi zishobora gutanga umusanzu mu gushakira umuti ibibazo bimaze igihe muri Repubulika Iharanira Demokarasi ya Congo.