Perezida Kagame yagarutse ku mukozi wabaswe n’inzoga kugeza ubwo bimugora gukora inshingano ze

Gasisi Enock 21 Oct 2026 Hashize Amasaha 2 2 views 0 ibitekerezo

Perezida wa Repubulika y’u Rwanda, Paul Kagame, yatanze urugero rw’umuntu yigeze gukorana na we, wahuye n’ingaruka zikomeye zo kunywa inzoga birenze urugero, ku buryo byatangiye kubangamira inshingano ze za buri munsi.

Iyi nkuru yayisangije urubyiruko rwari rwitabiriye ibiganiro yagiranye na rwo muri BK Arena, mu gikorwa cyiswe Youth MeetThePresident, cyabaye kuri uyu wa Gatatu, tariki ya 21 Ukwakira 2026.

Mu butumwa bwe, Perezida Kagame yagarutse ku ngaruka z’inzoga n’ibiyobyabwenge, asaba urubyiruko gufata ibyemezo bibafasha kwiyubaka no kugera ku ntego zabo.

Perezida Kagame yavuze ko uwo muntu bakoranaga yari afite umuryango, ku buryo yabanje gutekereza ko kutamubona mu masaha amwe y’umugoroba byaterwaga n’uko aba ari kumwe n’abe.

Yaje no kugerageza kumworohereza inshingano, ashaka abandi bantu bafatanya na we akazi kugira ngo abashe guhuza imirimo n’ibindi bikorwa bye. Icyakora, uko iminsi yagiye ihita, gukomeza kumubura igihe yari amukeneye byatumye atangira gushaka kumenya impamvu nyakuri yabiteraga.

Yavuze ko yaje gusanga ikibazo gifitanye isano no kunywa inzoga bikabije, aho uwo mukozi byageze aho bimugiraho ingaruka no ku bushobozi bwo gukora ibikorwa bisanzwe.

Mu rwego rwo kumenya neza ibibaye, Perezida Kagame yavuze ko yigeze gusaba ko uwo mukozi ashakishwa akazanwa aho yari ari.

Yasobanuye ko igihe uwo muntu yahageraga, byagaragaraga ko yari afite ikibazo gikomeye cyo kugenda no kuzamuka ingazi, ku buryo yagombaga kwifashisha urukuta.

Perezida Kagame yavuze ko yamubajije icyari cyamuteye kugera muri iyo mimerere, ariko uwo mukozi bikamugora gusobanura uko byagenze.

Nyuma y’icyo gikorwa, yamusabye gusubira kuruhuka, na we akomeza gushaka uko imirimo yari ishinzwe yakorwa n’abandi bakozi.

Mu gitondo cyakurikiyeho, yongeye kuganira na we ku kamaro ko kwifata no gushyira imbere inshingano z’akazi. Icyakora, Perezida Kagame yavuze ko kugerageza kumufasha bitatanze umusaruro yari yiteze.

Perezida Kagame yakoresheje uru rugero mu kugaragaza uburyo kunywa inzoga birenze urugero bishobora kugira ingaruka ku kazi, ku muryango no ku buzima bw’umuntu muri rusange.

Yasabye urubyiruko kudacika intege, kwiyubaka no kugira icyizere mu byo rushoboye. Yanarushishikarije kujya rusuzuma neza ibyemezo rufata, aho gukurikira ibyo abandi bafata nk’ibyiza rudatekereje ku ngaruka zabyo.