Rayon Sports yasinyishije umunyezamu Junior Dande ukomoka muri Cameroon

Aya makuru yatangajwe kuri uyu wa Gatatu, tariki ya 8 Nyakanga 2026, binyuze ku mbuga nkoranyambaga za Rayon Sports, aho iyi kipe yakiriye uyu munyezamu nk'umukinnyi mushya.

Junior Dande w'imyaka 28 afite uburambe mu mupira w'amaguru, kuko yakiniye amakipe atandukanye arimo AS Vita Club yo muri Repubulika Iharanira Demokarasi ya Congo hagati ya 2022 na 2024, Sewe Sports yo muri Côte d’Ivoire ndetse na UMS de Loum yo mu gihugu cye cya Cameroon.

Uyu munyezamu kandi yagiye yambara umwambaro w'ikipe y'igihugu ya Cameroon mu byiciro bitandukanye, birimo abatarengeje imyaka 20, abatarengeje imyaka 23 ndetse n'ikipe nkuru.

Kwinjira kwa Dande muri Rayon Sports bishobora gusiga hazaza h'umunyezamu Kwizera Olivier hakomeje kutamenyekana, kuko ibiganiro byo kongera amasezerano hagati ye n'iyi kipe bitaragera ku musozo.

Junior Dande abaye umukinnyi wa 13 mushya Rayon Sports imaze kugura muri iri soko ry'igura n'igurisha. Mu banyamahanga bamaze kwerekezayo harimo Boris Gbenou wo muri Repubulika ya Centrafrique, Issa Djiguiba wo muri Mali, Ibrahim Djingarey wo muri Niger, Antonio Atisso Kodjo wo muri Bénin, Charles Tchouplaou wo muri Tchad na Matumona Wakonda Kanda wo muri RDC.

Mu bakinnyi b'Abanyarwanda bamaze kwinjira muri iyi kipe harimo Ndayishimiye Didier, Nshuti Didier, Nisingizwe Christian, Nkundimana Fabio, Nizeyimana Mubarak na Muhoza Daniel.

Kuri ubu Rayon Sports iri mu mwiherero mu Karere ka Gicumbi, aho iri kwitegura amarushanwa atandukanye arimo CECAFA Kagame Cup, CAF Confederation Cup ndetse na Shampiyona y'u Rwanda.

Mbere yo gutangira ayo marushanwa, Rayon Sports izakina umukino mpuzamahanga wa gicuti uzayihuza na Gor Mahia yo muri Kenya kuri Rayon Day, uteganyijwe ku wa 18 Nyakanga 2026.