Karongi hateraniye inama y'Intara y' Iburengerazuba haganirwa ku imirire mibi n'igwingira hafatwa n' ingamba zo kuyigabanya

Iyi nama yayobowe na Minisitiri w’Uburinganire n’Iterambere ry’Umuryango, Uwimana Consolee.

Agaruka ku ishusho y'igwingira mu bana mu Ntara y’Iburengerazuba, Guverineri Ntibitura Jean Bosco yavuze ko iyi Ntara igifite umubare munini w'abana bari munsi y’imyaka 5 bagwingiye kuko bari kuri 32.7% hashingiwe ku byagaragajwe mu bushakashatsi ku buzima n’imibereho y’ingo (RDHS).

Guverineri Ntibitura: "Uyu mubare ni munini ndetse unarenze impuzandengo y’Igihugu iri kuri 27%. Urugendo dufite rusaba ubufatanye n’imbaraga zihariye zo kugabanya iki gipimo kikagera munsi ya 15% bitarenze muri 2029".

Yifashishije isesengura NCDA yakoze ku byavuye mu bushakashatsi ku buzima n'imibereho y'ingo bwa 2025, Umuyobozi Mukuru wa w’Ikigo cy’Igihugu Gishinzwe Imikurire no Kurengera Umwana, Ingabire Assumpta yasabye ubuyobozi bw'uturere gusesengura ibibazo bigihari n'impamvu muzi zituma abana bagwingira, abibutsa ubufatanye bw'inzego mu gukuraho ibyo bibazo.

Mu butumwa yatanze, Minisitiri yavuze ko umwana ugwingiye aba atakaje igice cy'ubushobozi bwe, Igihugu kiba gitakaje igice cy'imbaraga gishingiraho ejo hazaza, ariyo mpamvu kurwanya igwingira atari amahitamo ahubwo ari inshingano za buri wese.

Yavuze ko umwana wagwingiye aba afite amahirwe make yo gukura neza, gutsinda neza no kuzigirira akamaro ndetse akakagirira n'Igihugu.

Agaruka ku mibare y'uko uturere twagabanyije igwingira mu Ntara y'Iburengerazuba, ndetse n'uko Intara ihagaze (kuri 32.7%), Minisitiri yavuze ko bakiri kure ugereranyije n'intego y'Igihugu yo kugabanya igwingira kugera munsi ya 15% muri 2029. 

Yibukije abatuye kugaburira abana ibikomoka ku matungo cyane cyane amafi n'isambaza biboneka muri iyi ntara. Yasabye abitabiriye inama gukangurira abaturage kwirinda kugurisha umusaruro w'amata n'amagi bataraha abana.

Yasabye abayobozi n'abafatanyabikorwa gushyira imbaraga mu kugeza amazi meza ku baturage kugira ngo abafashe kwirinda indwara ziterwa n'umwanda kuko zigira uruhare runini mu gutuma abana batakaza intungamubiri bikabaviramo kugwingira.