Nyarugenge: Umukobwa yapfuye nyuma yo guterwa urushinge kugirango akurwemo agapira karinda gusama

Amakuru avuga ko mu ntangiriro z’iki cyumweru, uyu mukobwa w’imyaka 26 yagiye kuri iri vuriro riherereye ahitwa Kiruhura, agamije kwikuzamo agapira ko kuboneza urubyaro.

Bivugwa ko ubwo yari ageze ku ivuriro, Ndorimana Etienne yamutegeye urushinge rw’ikinya, nyuma yaho umukobwa ahita yitaba Imana.

Amakuru akomeza avuga ko mbere yo kujya kuri iri vuriro, nyakwigendera nta bundi burwayi yari asanganywe.

Nyakwigendera yashyinguwe ku wa 11 Kanama 2026, mu gihe inzego zibishinzwe zari zatangiye iperereza kugira ngo hamenyekane neza icyateye urupfu rwe.

Umuvugizi wa RIB, Dr. Murangira B. Thierry, yavuze ko umurambo w’uyu mukobwa woherejwe mu Kigo cy’Igihugu cy’Ibimenyetso bishingiye ku Bumenyi n’Ubuhanga bikoreshwa mu butabera (RFI), kugira ngo ukorerwe isuzuma ryimbitse.

Dr. Murangira kandi yemeje ko Ndorimana Etienne, ushinjwa kugira uruhare muri ibi byabaye akaba ari na nyiri Poste de Santé Inshuti Nyabikoni, yafashwe.

Uyu ukekwaho icyaha afungiye kuri sitasiyo ya RIB ya Karama, mu gihe iperereza rikomeje.

Umuvugizi wa RIB yavuze ko umurambo wa nyakwigendera wamaze gusuzumwa, ariko ibyavuye muri iryo suzuma bitarashyirwa ahagaragara.

Iperereza rikomeje kugira ngo hamenyekane impamvu nyakwigendera yitabye Imana ndetse n’uruhare rw’ukekwa muri iki kibazo. Ibyavuye mu iperereza ni byo bizashingirwaho mu gufata izindi ngamba ziteganywa n’amategeko.