RDC: Inzitizi zirenga 20 n’ibigo 15 byafungirwagamo abantu mu buryo butemewe byakuweho muri Kivu y’Amajyepfo

Gasisi Enock 23 Oct 2026 Hashize Isaha 1 101 views 0 ibitekerezo

Ubuyobozi bwa teritwari ya Fizi bwatangaje ko bwakuyeho inzitizi zirenga 20 n’ibigo 15 byafungirwagamo abantu mu buryo butemewe n’amategeko ku muhanda uhuza Fizi Centre na Misisi, mu ntara ya Kivu y’Amajyepfo, mu burasirazuba bwa Repubulika Iharanira Demokarasi ya Congo (RDC).

Samy Badibanga, umuyobozi wa teritwari ya Fizi, yatangaje ko iki gikorwa kigamije guhagarika ibikorwa byo guhohotera abaturage no gufata abantu uko bishakiye, bivugwa ko byakorwaga na bamwe mu barwanyi ba Wazalendo.

Amakuru yatangajwe n’ubwo buyobozi ku wa 22 Ukwakira 2026 avuga ko icyo gikorwa cyakozwe ku bufatanye na Amuri Yakutumba, uzwi kandi nka Yamouri Yakutumba, umuhuzabikorwa wa Wazalendo.

Muri ibyo bikorwa, ubuyobozi bwa teritwari ya Fizi bwatangaje ko urubyiruko rusaga 200 rwiyandikishije kugira ngo rwinjire mu Ngabo za Repubulika Iharanira Demokarasi ya Congo (FARDC).

Samy Badibanga yavuze ko abarwanyi ba Wazalendo bari mu gace ka Misisi bitabiriye igikorwa cyateguwe n’abashinzwe gushaka abantu binjira mu gisirikare.

Yongeyeho ko abo barwanyi bahawe amabwiriza yo kujya mu birindiro by’urugamba biri mu misozi miremire ya Fizi, cyane cyane mu gace ka Minembwe.

Uyu muyobozi yavuze kandi ko hari abantu avuga ko bafitanye isano na Joseph Kabila, wahoze ari Perezida wa Repubulika Iharanira Demokarasi ya Congo, barimo kurwanya ingabo za leta muri ako gace.

Ibi bibaye mu gihe umutekano ukomeje kuba muke mu misozi miremire ya Fizi, ahakomeje kubera imirwano hagati y’ingabo za FARDC n’imitwe itandukanye yitwaje intwaro.

Gukuraho inzitizi zitemewe no guhagarika ibikorwa byo gufungira abantu ahantu hatemewe ni ingamba ubuyobozi buvuga ko zigamije kugabanya ihohoterwa rikorerwa abaturage no kunoza urujya n’uruza rw’abantu n’ibicuruzwa muri ako karere.